|
La
cultura del Pan en Carcedo. |
Manolo Pérez
Había qu´espayar. En faciendo los manoyos hai que los atar, enfacinar y
acarrear a la era.Nun carro poníanse unos sesenta manoyos, más ou menos.
LA MAYADA.
Pa mayar usábanse´l manar, que tien dos palos: el que maya tien que se de
xardón ya´l que se garra cola mano tien que ser, por exemplu, de castañal,
porque yía una madera menos dura ya más aquello pa mover el manar.
Dempués de la mayada quítase la paya con un garabatu de dientes mui llargos
pa que quede la grana. Un día con muito aire hai que baliar, dexando caer el
granu nuna sábana. Dempués, los sacos con granu llévanse al horru ou a la
panera.
EL MOLÍN
Pa moler los granos hay que los llevar al molín, que pue ser de maquila ou
pagu, teniendo entós que pagar n´especie pola molienda. Pero´l molín pue ser
tamién propiedá d´un grupu de vecinos, que van por vecera usándolu. Usanse
muelas distintas según seya maíz ou trigu lo que se muel.
AMASAR
La farina que vien del molín hay que la peneirar, dexando´l salváu pal ganáu
ya pa facer cataplasmas. La masa prepárase na masera cola farina ya tamién
agua, amás del formientu pa que llielde ou miedre´l pan. A masa dáse-lly l a
forma de los bollos con un concu de madera que fai de molde. El pan llieldáu
tien que coincidir col fornu bien a puntu.
ENFORNAR
El fornu prepárase arroxándolu ya p´arroxalu hai que prender con gárabos ya
garabuyos, que son canas delgadinas ya secas. Cuando´l fornu ta arroxáu
quítanse las cenizas cola rapona ou rodaballu ya dempués bárrese´l fornu con
escobos d´uz ou canas de castaño verde. Métense los panes pa que nun cuezan
de más nin de menos. ábrese la tapa del fornu pa vixilar cómo van cociendo
ya cuandu paez que tán los panes cocíos a puntu hai que los sacar cola pala.
TIPOS DE PANES
Del fornu salen panes de distinta clas. Asina tenemos los bollos preñaos,
que podían ser de chourizo uo de bonitu. Tamién yera importante la rosca de
Pascua ou Alfilada, que yía un bollu con manteca.
Comíase tradicionalmente pan blancu (de trigu) ya pan de maiz. El pan de
maiz yera pa los días normales ya´l pan blancu yera palos días de fiesta.
El maiz llevábase al molín pa molelu colas muelas afayadizas. Dempués na
casa amasábase la farina de forma aparecida a comu se facía cola farina de
trigu. Pero al enfornar, hai que tener en cuenta que´l fornu tien que tar
arroxau con más calor cuando la fornada yía de pan de maiz. Amás de la
Borona, de maiz faciase tamién la rapa, que llevaba duas capas con griñispos
con freba ya, en dellos casos un pouco de chourizo dientru. La rapa
envolvíase en berzas. La farina de maiz val tamién pa facer papas, pero
cuando se faen las papas fai falta torrar los granos primero, antes de
moler.
|
Contactar
Aviso Legal